Ленинград областьыште «Пеледыш пайремым» Санкт-Петербургысо «Кугу Охта» муниципальный образованийын «Ош кече» Марий национально-культурный автономийже ямдылен да эртарен.
Пайрем тӱҥалтыштак верысе марий-влак шнуй отыш лектыныт да тушто «Агавайрем» кумалтышым эртареныт. Кумалтышым лӱмынак Санкт-Петербургыш Марий Элысе Куженер район гыч мийыше карт А. Рукавишников вуйлатен. Питерысе марий-влак тыгай юмынйӱлам икымше гана эртареныт да, Марий тӱвыра рӱдерын пашаеҥже Л. Сидоркинан мутшо почеш, шочмо кундем деч мӱндырнӧ илыше-влак моткоч куаныше да кугу кумылан лийыныт: вет Альберт Иванович кумалме гутлаштак икмыняр тӧрлатымашым ыштен — тӱрлӧ осал деч эрнаш манын, южо кундемыште тул гоч тӧрштылыт, но йӱла почеш, тул йыр кум гана савырныман.
Вара «Пеледыш пайрем» тӱҥалын. Погынышо калыкым Санкт Петербургысо «Кугу Охта» муниципальный образованийын «Ош кече» Марий национально-культурный автономийжын вуйлатышыже Р. Факаева, Ленинград областьысе «МариЛен» автономийын председательже Е. Соловьева, Санкт-Петербургысо «Илем» «ОМК» ОО-н вуйлатышыже Д. Михеев, Мер Каҥашын еҥже В. Кудрявцев, «Марий Эл» газетын журналисткыже А. Эманова саламленыт. А Марий тӱвыра рӱдерын пашаеҥже Л. Сидоркина Марий Эл Республикын культура, печать да калык-влакын пашашт шотышто министрже М. Васютинын саламлыме шомакшым лудын пуэн.
Пайремын тӱвыра программыже моткоч поян лийын. Тӱрлӧ модыш да спорт таҥасымаш, марий калыкын кухньыжым ончыктымо деч посна Карелий Республик гыч мийыше, ынде финн-угор тӱняште сайын палыме «Акрет Марий» ансамбль мастарлыкшым ончыктен. Тыгак верысе марий-влакын Ленинград область, Всеволожский районысо Воейково села гыч «Какшан Марий» ансамбль куандарен.
По ходу празднества гости из Марий Эл провели несколько мастер-классов. Руководитель ансамбля «Марий памаш» из Йошкар-Олы М. Соловьева охотно учила питерских марийцев танцам народа мари. Методист Центра марийской культуры Л. Сидоркина провела мастер-класс по вокалу, в ходе чего изучали песню «Марий погына» («Собираются марийцы»), а мастер по прикладному искусству В. Кудрявцев показал как делаются финские тарелки и другие изделия.
Пайрем жапыштак Марий Эл гыч мийыше специалист-влак икмыняр мастер-классым эртареныт. Йошкар-Олаште веле огыл, моло кундемысе марий-влак коклаштат кумдан чапланыше «Марий памаш» фольклор ансамбльын вуйлатышыже М. Соловьева марий калыкын тошто куштымашыж-влак дене палдарен. Марий тӱвыра рӱдерын методистше Л. Сидоркина мурымо шотышто мастер-классым эртарен.. Тыгодымак тудо верысе марий-влаклан «Марий погына» мурым туныктен.
А кас велеш чыланат «Марий касыште» кап-кылыштым лывыртеныт.
* * *
Киров область, Пижан районысо Марий Ошай ялыште «Пеледыш пайрем» Марий культурын областьысе рӱдержын тыршымыж дене эртен. Марий Эл гыч делегацийым Марий тӱвыра рӱдерын вуйлатышыже, Марий Элын сулло артистше В. Григорьев вуйлатен.
Пайрем тӱҥалмеке, торжественный ужашыште Пижан район администрацийын вуйлатышыже В. Домрачев, Мер Каҥашын еҥже А. Кудрявцев саламлыме шомакым ойленыт. Марий Эл Республикын культура, печать да калык-влакын пашашт шотышто министрже М. Васютинын пошкудо областьысе калыкым саламлыме шомакшым В. Григорьев лудын пуэн да шке гыч шошо ага пашам пытарыме дене чылаштым шокшын саламлен.
«Пеледыш пайремлан» Пижан кундемысе марий-влак икмыняр выставкым лӱмынак ямдыленыт. Декоративно-прикладной искусство, тусо марий-влакын вургемышт дене да моло денат палдарыше выставкылаште, Валерий Помбеевичын мутшо почеш, чылажат моткоч оҥай да сӧрал лийын. Пошкудо областьысе родына-влак кугезына-шамычын поянлыкыштым моткоч перегат, тыгодымак шке гычат, жаплан келшышын, уым пуртат, манше В. Григорьев.
Варажым Йошкар-Ола гыч мийыше «Марий памаш» фольклор ансамбль шке мастарлыкше дене куандарен. Тыгак Уржум, Санчурск, Кикнур районла гыч ансамбль-влак Пижаҥыш лӱмынак унала миеныт. Мутат уке, Марий Элын рӱдолаж гыч ансамбль утларак келшен да тудым шӱм шулен колыштыныт, шинчам кораҥдыде онченыт — вет Йошкар-Ола гыч артист-влак тудо кундемлаште пеш шуэн лиедат.
Вадим ден Эльвира Красновмытын выступленийыштат чылаштым куандарен. Сылне йӱкышт дене чонлан келшыше муро-влакым мурымыштым уэш да уэш колыштмо шуэш, маныныт Киров областьысе марий-влак.
Пайрем мучаште Марий Эл гыч мийыше уна-влак оза-шамыч дене чеверласаш вашкен огытыл — Пижаҥ районысо Ластик ялыште «Марий памаш» пӱтынь концерт программыжым ончыктен. Верысе калык артист-шамычым моткоч шокшын вашлийыныт, нунын дек чӱчкыдынрак мияш йодыныт. Тылеч посна тусо марий-влак шочмо йылмыштым, калыкнан тӱвыражым арален кодымо шотышто чот тургыжланат да тиде амал денак тушто семинар-практикум ден мастер-класс-шамычым эртараш йодыныт.
