Торжественный ужаш деч вара муро конкурс тӱҥалын. Тыштыже шке мастарлыкыштым кок вокальный ансамбль да коло ик посна мурызо ончыктен. Весымат палемдыде ок лий: шуко участникше Угарман областьысе Тонкин район, Старые Краи села гыч лийын. Туге гынат вес кундемла гыч толшо-влакат шкеныштым мӧҥгыштыштак гаяк шижыныт да тӱрлӧ муро дене куандареныт. Нунын коклаште «Мый йомакым лудам», «Ой, гармонист», «Волгыдо йӧратымаш», «Кырык марла шиеш йӓнг», «Ой, йолташем» да моло мурат йоҥгалтыныт. Участник-влак шке коклаштышт кум категорийыште – 9 ияш марте, 9 гыч 13 ияш да 13 гыч 18 ияш марте – таҥасеныт. Марий Элысе Оршанке район гыч Миша Иванов «Шочмо-кушмо верыште» муро дене икымше верым сеҥен налын. А Шернур район гыч Настя Иванова «Шернурем-моторем» муро дене фестивальын гран-приж дене палемдалтын.
Фестиваль пытымекат, калык шаланен каяш вашкен огыл: чыланат марий сем почеш кумылын кушталтеныт. Тидлан Марий Эл Республикын сулло артисткыже Раисия Данилова шке чолгалыкше дене кумылаҥден моштен. Тудак фестиваль-конкурсымат вӱден.
«Йыргешке ӱстел» йыр мутланымаште фестиваль-конкурсым ямдылыше да эртарыше, тыгак уна-влак тыгай муро мероприятийын кӱлешлыкшым кӱкшын акленыт. Эсогыл спонсор-влакат шке кумылын фестивальыш ушненыт да кертмышт семын полшеныт. Участник-влак ий гыч ийыш ешаралтыт, сценылык вургемыштат утларак саемын, шкем кучен моштымыштат кушкын. Но тыгодымак икмыняр нелылыкымат палемденыт. Мутлан, Угарман областьыште илыше марий-влаклан таче кечын марий тӱвырам утларак кугу кӱкшытыш нӧлтал колташ мурымо, куштымо шотышто специалист-влак огыт сите. Тыгак тусо родына-влак марий литератур йылме дене мутланаш кумылан улыт, но чаманен каласаш логалеш, тидын шотыштат нунын нелылык изи огыл – марий литератур йылме дене мутланаш туныктышо уке. Адакшым кундем-влак кокласе тыгай фестивальлан мурызо-влакым ямдылыме шотышто семинар-практикум-влак кӱлыт, маныныт. Пытартыш конкурсышто самырык ӱдыр-рвезе-влакын репертуарыштат ийготыштлан изишак келшыдыме лийын – тидын шотыштат шоналташ уто огыл: муро текст-шамыч йоча-влаклан келшыше лийшаш улыт. А тидлан марий муро фонограмме-влак кӱлыт.
