Уремыште Марий тӱвыра рӱдерын пашаеҥже-влак А. Орлова ден Г. Ласточкина йоча-влаклан йокрокланен шогылташ эрыкым ышт пу: ик модыш почеш весе дене куандарышт – тидыже ӱдыр-рвезе-влакым утларак кумылаҥдыш. Варажым нуно путырак чулымештыч. Тӱшка модмаште нунылан поснак марий модыш-влак келшеныт, коеш: ӱдыр-рвезе-влак «Вӱд йогынышто», «Шукшышто» писынрак тарваныльыч. Мутат уке, украин калыкын «Лавата», рушын «Келшен илена», йот элысе калык-влакын «Буги-буги» модышлаштат нуно ӧрын шоген огытыл – икте-весе дене, кидым ваш кучен, оҥго йыр кумылын пӧрдыч.
Тиде жапыштак йоча-влак асфальтыште пор дене тӱрлӧ сӱретым ыштыльыч. Нунылан кажныжлан Образований да наука министерстве пашаеҥ-влак шарнымашан пӧлекым кучыктышт.
Марий тӱвыра рӱдерын пашаеҥже-влаклан уремыште йоча-влакым тӱрлӧ модыш дене модыкташ Марий кугыжаныш университетын студентше-влакат кумылын полшышт.
А пытартышлан Оршанке районысо Кугунур селасе «Изи мӱкш» йочасадын художественный вуйлатышыже Ирина Кудрявцева йоча—влак тӱшкашке баян дене ушныш да чылаштым марла кушташ таратыш. Тыштат ӱдыр-рвезе-влак шке изи мастарлыкыштым тӱргочак ончыктышт. Икшывына-влак изинекак марий тӱвырана дек содыки кумылаҥ кушкыт.
Тидыжым варарак М. Шкетан лӱмеш драме театрын сценыштыжат пеҥгыдемдышт.
Шкешотан концертым Марий эстрадын эн самырык шӱдыржӧ Денис Кораблев почо. Тудым ынде ончышо калык сайын пала: кажне гаяк концертыште шке мастарлыкшым ончыкта, у муро-влак дене куандара.
Вара вӱдышӧ-влак сценышке Марий Эл Республикын образований да наука министрже Г. Швецовам ӱжыч. Галина Николаевна ӱдыр-рвезе-влакым, погынышо калыкым Йочам аралыме тўнямбал кече дене саламлыш да ончыкыжымат шке мастарлыкым шуараш, кугурак-влакым пагалаш, ончыкылык илышлан кыртмен ямдылалташ тыланыш. Тыгайракак шомак-влак йоҥгалтыч «Национальный банк сбережений» банкын Марий Элыште управляющийже В. Авдеев, йоча-влакын праваштым аралыме шотышто республикым вуйлатыше пеленсе уполномоченный Е.Бурдо деч.
Концерт умбакыже шуйныш. Палемден кодаш уто огыл: тиде кечын кугу сценыш шке кундемлаштышт сеҥыше-влак лектыныт. Икте мурым мурен гын, весе почеламутым йоҥгалтарен. Районласе йочасадлаште эсогыл куштышо ансамбль-влакат улыт. Теве тӱҥалтыштак Шернур поселкысо «Колокольчик» йочасад гыч изи ӱдыр-рвезе-влак марла сайын кушталтышт. Конешне, молат почеш ышт код. Чылажат моткоч оҥай да чоным куандарыше ыле.
Концертыште шке мастарлыкым ончыктышо кажне ӱдыр-рвезылан посна пӧлекым кучыктышт. Шкешотан пайрем кечын тидыже икшыве-влаклан поснак куанле пӧлек лие.
Палемден кодыде огешак лий: «Пеледше тукым» фестиваль-конкурслан тӱҥалтышым шке жапыштыже Марий пединститутын туныктышыжо З. Иванова пыштен.
