«Автодор» тӱвыра полатыште 23 декабрьыште йоча-влакын куан йӱкышт дене теме. Тиде кечын кок гана пайрем кож чӱкталте: кечывал деч ончыч, 10 шагатлан, – йоча садыш коштшо икшыве-влаклан, кечывал деч вара, 13 шагатлан, — Йошкар-Оласе школышто тунемше-влаклан. Тыште нуным Йӱштӧ Кугыза ден Лумӱдыр, тыгак марий йомакын янлыкше-влак шокшын вашлийыч. У ий кож йыр сылне марий муро, весела куштымаш дене, кидым ваш кучен, тӱшкан юарлен, куанен пӧрдыч. «Йӱштӧ Кугызалан серыш», «Марий У ий модыш», «У ийлан келшыше вургем» конкурсышто сеҥыше-влаклан шергакан пӧлекым кучыктышт.

 

 

Тений районысо школ-влакымат ӧрдыжеш кодымо огыл. Нунылан лӱмынак 26 декабрьыште «У 2012 ий» пайрем эртаралте. Тышке 11 районла гыч тунеммаште, мер пашаште, олимпиадыште, конкурслаште кугу кӱкшытым налше, тунемше-влак чумыргеныт. Йоча-влаклан шарнымашан да тамле пӧлекым, сертификатым кучыктымо.

24 декабрьыште У ий кожна илалше иготан-влакым шке йырже чумырыш. Нуным Маска ден Маша вашлийыч. Йӱштӧ Кугыза ден Лумӱдыр эн вучымо уна лийыч, чыланат пырля кругыш шогалын кож йыр марла мурышт-куштышт.