Чолга ӱдыр-рвезе-влак Палантай лўмеш Тӱвыра да сымыктыш колледжыште, Марий кугыжаныш университетыште тунемыт да каныш жапым «У муро» кружокышто, Студент театрыште эртарат, мураш да сценыште мастарлыкым ончыкташ тунемыт. Кружок вуйлатыше Геннадий Григорьев самодеятельный композитор-влак Александр Мамаев да Алексей Кузьминых дене пырля ӱдыр-рвезе-влаклан ийготлан келшыше мурым да профессионал кӱкшытан фонограммым ямдылат. Тыге икмыняр жап Марий тӱвыра рӱдер самырык, мураш тӱҥалше-влаклан кугу сценышке да муро аланышке корным почеш. Рӱдерын помышыж гыч марий мурызо-влак Алена Яковлева, Володя Матвеев, Ирина Мамаева да молат шуаралт лектыныт. Опытым Марий рӱдерысе самырык-влаклан каныме касыштат погаш лиеш. Шке йӱк дене мурымым калыкыште эре пагален шогат, у мурым куанен вашлийыт. «Мураш гына тыршышт», — чулымын ойла Марий тӱвыра рӱдерын методистше Надежда Николаева. – А калыкышке лукташ да сценыште шкем пеҥгыдын кучаш ме туныктена.

Теве У ий деч ондак эртыше «У Ий муро» пайрем концерт у сынан лийын. Ончаш толшо калык у мурызо-влак дене пырля Йӱштє Кугызан илыме верышкыже логалыныт. Юзо тӱняш миен кошташ Пургыж, Юзо ӱдыр, самырык мурызо-влак (О.Богачева, Ю.Медведева, А.Алмаматов, А.Ямбаршев, К.Семенова, И.Мамаева, Д.Конаков, К.Юркина, М.Чулкова), Студент театр полшеныт.

Ончаш толшо калык муро корныш икымше ошкылым ыштыше-влакым рўж совым кырен вашлийын. Икмынярынже, илалшыракше, мемнан годым тыгай кружок-влак пашам ыштат гын, мыят кугу мурызо лиям ыле дыр, манын кєранен шыргыжалыныт.