“60 ИЙ – ТУТЛО ЛИЙ!”

Мурыла кушто тылзе иеш,

Кушто киндым сӧра шурнысавыш,

Шошо кечын мотор ик иеш

Ош тӱня илыш вийже ден савырыш, –

воза Геннадий Сабанцев-Ояр ик почеламутыштыжо. А мотор ийын ик шошо кечыже 1958 ий 8 апрельыште лийын. Тений тиде кечын Марий Элын сулло журналистше, Марий Элын калык поэтше Геннадий Сабанцев-Оярлан 60 ий темеш.

Тидын лӱмеш 2018 ий 8 апрельыште Кужэҥер посёлкысо Тӱвыра пӧртыштӧ поэт лӱмгече касым эртара. 14:00 шагатлан тӱҥалеш.

Касым сӧрастарат: Иван Смирнов, Светлана Строганова, Роза Искакова, Снежана Орлова, Алексей Юнусов, Иван Соловьёв, Станислав Устюгов, Саша Иванов, Юрий Ахтямов, гармоньчо Алексей Горинов.

Кумылан-влакым Г.Сабанцев-Ояр пагален ӱжеш.

* * *

9 АПРЕЛЬЫШТЕ Г.Сабанцев-Ояр 15:00 шагатлан В.М.Васильев лӱмеш МарНИИ-н конференц-залышкыже йолташыж ден палымыж-влакым пога. Кӧ поэтым 60 ияш лӱмгечыж дене саламлаш шона, алал кумылын вучена.