Ӱшнӱр кундемыште Марий Ӱярня

 

 

Пайремым шижын кечат шыргыж лекте, пургыжат  шыпланыш.

 

Ӱмаште республик кӱкшытан Ӱярня пайрем Обалыш ялыште эртаралтын. Садланак тусо кундем гыч толшо «Эрвий» ансамбль «Весела кумыл» ансамбль дене кинде вашталтымаш йӱлам ыштышт, тидыже шке шотан эстафетым пуымаш лие.

 

Тиде кечын Ӱшнӱр кундем ятыр районла гыч уна-влакым вашлийын,  гармонь да тӱмыр сем Ӱшнӱр кыдалаш школ ончылно кас марте йоҥген. Шоҥешталтше пура, тутло деч тутло мелна кажне айдемын чоныштыжо пайрем кумылым пуртен. Латкум фольклор ансамбль (У Торъял, Куженер, Оршанке, Медведево, Килемар, Советский) Ӱярня пайремышке шке мастарлыкыштым ончыктен. Мотор марий вургем да марий сем кажне еҥын чоныштыжо кугешнымаш кумылым ылыжтыш. Ӱшнӱр курык гыч мунчалтышыже изижге-кугужге юарлен издер да волак дене  ӱчаш-ӱчаш воленыт. Погынышо калык карта паҥга, ече, салмавондо дене таҥасен модыныт. Кумылан-влак имне дене шинчын коштыныт.

 

Школ кӧргыштӧ  кинде авызлымаш йӱлам онаеҥ-влак шуктеныт. Ондак нуно Ош Поро Кугу Юмо деч кинде перкем йодыныт, варажым чылаштым кинде, мелна дене сийленыт.

 

Мучашлан чыла осалым поктен колташ манын чучелым йӱлалтеныт.

 

Похожие записи