Таче кече гыч Автодор тӱвыра полатыште марий дискотеке тургым почылтеш — теве тыге чолган тӱҥале шке ойжым вӱдышӧ Роза Искакова. Моткоч шукын погыненыт манына гын, нигузе ойлымо семын лиеш. Марий мурын йолташыже-влак чулымын толыныт, эсогыл икымше курсыш тунемаш пурышо-влакат Автодор тӱвыра полатыште «шкенан» семынак кучышт. Тугеже гын, вученыт.

Икымше курсышко тунемаш пурышо-влакым Марий тӱвыра рӱдерын вуйлатышыже В.П. Григорьев саламлыш да «Рвезылык» ушемышке уста ӱдыр-рвезе-влакым пагален ӱжӧ, а марий бард Г.Григорьев мураш йӧратыше-влакым «У муро» вокал кружокыш мураш кӱштыш. Толыт, очыни – вучена.

Каныме касым палыме мурызо-влак Роза Искакова, Лариса Сидоркина, икымше ошкылым ышташ тӱҥалше-влак, «У муро» кружокын участникышт Нина Богатырева, «Чимарий» группа сӧрастарышт.

Марий сем почеш каналташ толшо-влаклан Марий тӱвыра рӱдерын коллективше чыла йоным ыштен: современный аппаратур, звук, лазер, тӱрлӧ тӱсан свет, залыш пурымек йомакысе верыш логалмыла чучеш.

Тыште йолташ-влак денат кутыралтен налаш жап, палыме лияшат йӧн уло. А вӱдышӧ-влакын тӱрлӧ модышлан, викторинылан, конкурс-влаклан кумылаҥдымышт чылажат уш-акылым писемдаш, кап-кылым куштылемдаш тарата.

Каныме касын тематикыжат кажне гана календарь шот дене вашталтын толеш. Ты гана студент-влаклан пӧлеклалтше лийын гын, весыже тӱнямбалсе тыныслык кечылан. Пеҥгыдын каласена — кажне гана каныме кас моткоч пайдалын эрта.

Вес гана каныме кас 21 сентябрьыште лиеш. Мемнан деке «Тоника» ден Кристина Семенова унала толыт. Вашкыза, вучена.