Моткоч кумда мемнан тӱня сандалык.
Ик тыныс кумдыкшо – Марий кава.
Ила ик ешла тыште тӱрлӧ калык,
Вет кажныжлан Республикна – Ава!
Тыгай мотор почеламут дене Республикылан да Марий тӱвыра рӱдерлан 10 ий темме лӱмеш пӧлеклалтше концерт тӱҥале. Концертым ончаш калык тич погынен, эсогыл шинчыме верат кодын огыл, шукыштлан шогашат логалын.
Эн ончычак «Шокто гармонь» ансамбльын изи шӱдыржӧ-влак чыла ончышо-влакын чоныштым куандареныт. Концерт программе деч посна Марий Эл нерген видеоролик моткоч сӧрастарыше лийын.
Пайрем касын кокымшо ужашыштыже пагален толшо уна-влак Марий тӱвыра рӱдерым лу ияш лӱмгечыж дене шокшын саламленыт. Поро тыланымаш дене Марий Эл Республикысе Правительстве вуйлатышын алмаштышыже, тўвыра, печать да калык-влакын пашашт шотышто министр М.З. Васютин , Кугыжаныш Погын вуйлатышын алмаштышыже А. Н. Иванов толыныт. Руш да татар рӱдер-влакат тиде кечын ӧрдыжеш кодын огытыл. Нунат Марий тӱвыра рӱдерым чапле лӱмгечыже дене саламленыт. Концерт жапыште ончышо-влак Марий рӱдерын пашажым слайд гоч эскереныт.
Икманаш, пайрем кас моткоч веселан эртен, кажнылан шарнымашеш кодын.