Унчо – финн-угор тӱнян Тӱвыра рӱдолаже

Ямдылыме: 11 вӱдшор 2018

7-10 апрельыште Эстонийыште, Обиница селаште, финн-угор ял-влакын II форумышт эртен. Тушто 2019 ийысе финн-угор тӱнян Тӱвыра рӱдолажым сайлыме.

Ешын поянлыкше да тукымвож серлагышыже нерген конференций каласкала

Ямдылыме: 10 вӱдшор 2018

«XXI курым тӱҥалтыште ешын поянлыкше да тукымвож серлагышыже». Тыгай лӱм дене краевед конференций лиеш. Тудо 26 апрельыште МарНИИ-н конференц-залыштыже эрта. Тудым эртарыме ик тӱҥ амал семын кызытсе самырык тукымым патриотизм шӱлышеш шуарымым, шке тукымын эртыкшым шымлымым, шочмо ялым да кундемым пагалыме кумылеш куштымым палемдыман.

Геннадий Сабанцевын тутло лӱмгечыже

Ямдылыме: 10 вӱдшор 2018

9 апрельыште В.М.Васильев лӱмеш МарНИИ-н конференц-залыштыже серызе да журналист, Марий Элын калык поэтше Геннадий Сабанцевын 60 ияш лӱмгечыжлан пӧлеклалтше вашлиймаш кас эртен.

Юбилей дене!

Ямдылыме: 08 вӱдшор 2018

Таче, вӱдшор тылзын 8-ше кечынже, шке лӱмгечыжым Кужэҥер кундемын йӧратыме да пагалыме эргыже, талантан поэт, журналист, кусарыше Геннадий Сабанцев-Ояр палемда! Тудлан таче 60 ий темын! Шагалжат, шукыжат огыл, а содыки илыш курымын ик пелыже.

Мо тиде тыгай пӧръеҥлан 60 ий? А тудо лачак саска шочыктышо, пеҥгыде олмапу гай, кушто кажне саскаже – тиде эртыше ий-влак – тендан сулен налме поянлык. Кажне чевер олмаже – тыланда перегыме суапак. Иктыже – йӧнештыш, весыже – сеҥымаш. Молыжо – тазалык, мунлык, шынык, вий. Тек илыш тыланда, Геннадий Леонидович, кажне ийын эше шукырак саскам пӧлекла. А ийым ида шотло, тудо толеш да кая, а тендан чон тугаяк самырык кодеш! Саламлымаш дене Республикысе марий тӱвыра рӱдер!

Марий Кугече Унчышто эрта

Ямдылыме: 04 вӱдшор 2018

15 апрельыште «Кугече» Mari-folk пайрем Морко район Унчо селаште эрта. Пайрем жапыште Унчо вел калык «У тувырым чиктымаш», «Кугече лӱҥгалтыш», «Ташлама корка» йӱла-влакым ончыкташ тӱҥалыт. Пайрем 11 шагатлан тӱҥалеш. Республик кӱкшытан мероприятийым Республикысе марий тӱвыра рӱдер Марий Эл Республикын тӱвыра, печать да калык-влакын пашашт шотышто министерствын, Морко район администрацийын да Унчо ялысе администрацийын полшымышт дене эртара.