Вӱдшорын 10-шо кечынже Йошкар-Оласе Чарла Кремльыште шошо ярминга эртаралтеш. Тудо «Приволжьеште мотор каныш» проект кышкарыште Самара ола гыч Марий Элыш икымше турист поезд толмылан пӧлеклалтын.

Мероприятий 10 шагатлан тӱҥалеш. Республикысе агропромышленный комплекс, фермер да посна озанлык-влакын кочкыш продукцийыштым, калык мастар-влакын сатуштым луктыт.

Марий тӱвыра рӱдер турист-влаклан «Шошо пазар» тӱвыра мероприятийым эртара. «Кугезе кумыл», «Ший арщащ», «Олык сем», «Поро кас», «Мари гармонь», «Пуры цӓш» фольклор коллектив-влак уна-влакым марий калыкын фольклоржо, йӱлаже дене палдараш тӱҥалыт. «Шошо пазар» 15 шагатыште тӱҥалеш.