Адрес: 424000, Марий Эл республик, Йошкар-Ола, Первомайский урем, пӧрт 109.
Тел.: (8362) 45-88-51

Е-mail:mari-centr@mail.ru

рушла
Arrow
Arrow
Slider

Вӱдшор тылзын 26-шо кечынже Марий Эл Республикыште Марий Талешке кече палемдалтеш. Республикысе марий тӱвыра рӱдер тиде пайремлан икмыняр мероприятийым эртара. Иктыже – «Ший талешке» респубоикысе фестиваль

Тений «Ший талешке» республикысе фестиваль вӱдшор тылзын 24-ше кечынже Йошкар-Оласе 1-ше №-ан школышто эртен. Тудо Афган эл гыч совет войскам лукмылан 30 ий теммылан пӧлеклалтын. Марий Эл деч афган сарыште кум тӱжем наре салтак кучедалын.

Презентаций паша фестивальым Республикысе тӱвыра, печать да калык-влакын пашашт шотышто министерствын калык да конфессий-влак кокласе кыл отделын тӱҥ специалистше О.А. Веденкина, Марий тӱвыра рӱдерын директоржо Р.А. Юрьева да 1-ше №-ан школын директоржо Н.И. Малева саламлымаш мут дене почыныт.

Мероприятийыште кугу уна-шамыч – афган сарын ветеранже-влак – В.Н. Самокаев, С.И. Яндемиров, И.М. Морозов да «Афганистан ветеран-влакын российысе ушемышт» марий отделенийжым вуйлатыше А.В. Питателев  лийыныт. Александр Владимирович афган сар нерген, кызытсе илышыште мо эртаралтме нерген мутым тарватен да чылаштымат пайрем дене саламлен. Икмыняр участник кочашт денат толыныт ыле.

Умбакыже мероприятий изирак концерт дене шуйнен. Чоныш логалше муро да почеламут-влак шагал огыл йоҥгеныт.

«Ший талешке» фестивальыш 45 участник ушненыт. Татарстан кундем Кукмара район Кна ялысе кыдалаш школ гычат Кирилл Родыгин презентаций пашажым колтен. Но, чаманен каласаш логалеш, толын кертын огыл. Тунемше-влак кум секцийыште презентаций пашаштым араленыт. Йоча-шамыч «Нуно икымше лийыныт», «Нуно тушто лийыныт» кок номинацийыште таҥасеныт. Участник-влак шке презентаций пашашт нерген рушла да марла каласкаленыт. Палемдыман, йоча-влак чыланат сайын ямдылалт толыныт, нунын презентацийыштышт келге шымлымаш паша палдырнен. Нунын куандарыше лектышыш  шумаште туныктышо-влак кугу надырым пыштеныт.

Республикысе «Ший талешке» презентаций паша фестивальыште сеҥышышке тыгай тунемше-влак лектыныт:

«Нуно икымше лийыныт» марий группо: 1-ше верым У Торъял район Кузнецово тӱҥ школ гыч Ангелина Веденькиналан пуымо, 2-шо вер дене Йошкар-Оласе 1-ше №-ан школ гыч Мария Шабалинам палемдыме, 3-шо верым Йошкар-Оласе 17-ше №-ан школ гыч Анастасия Попова ден Ангелина Ягодаровалан кучыктымо.

«Нуно тушто лийыныт» марий группо: 1-ше вер дене 2-шо №-ан Морко кыдалаш школ гыч Татьяна Ефремовам палемдыме, 2-шо верым Советский район Кадам тӱҥ кыдалаш школ гыч Юлия Васияровалан пуымо, 3-шо вер Куженер район Ӱштымбалысе тӱҥ школ гыч Диана Березиналан логалын.

«Нуно икымше лийыныт» руш группо: 1-ше верым Йошкар-Оласе 1-ше №-ан школын  тунемшыже-влак Ульяна Бусыгина ден Дарина Мухаметханова налыныт, 2-шо вер Йошкар-Оласе 1-ше №-ан школын тунемшыжлан Александр Бурлаковлан пуалтын, 3-шо вер Семёновко селасе 21-ше №-ан школын тунемшыжлан Кирилл Домрачевлан логалын.

«Нуно тушто лийыныт» руш группо: 1-ше вер дене Йошкар-Оласе 1-ше №-ан школын тунемшыже Артём Соловьёв палемдалтын, 2-шо вер дене Советский район Михайлово тӱҥ школын тунемшыжым Лидия Пайбердинам саламлыме, 3-шо верым Волжский район Кугу Порат кыдалаш школын тунемшыштлан Дарья Денисова ден Кристина Ашкельдиналан пуымо.

«Нуно икымше лийыныт» номинацийыште марий группышто таҥасыше-влаклан Морко район 1-ше №-ан школын туныктышыжо В.Г. Афанасьева школышто афган сарыште лийше салтак-влак нерген шымлымашым виктарыме паша опытшо дене палдарен.

«Ший талешке» фестивальыш ушнышо участник-влакым мокталташ лиеш да кӱлеш. Йоча-влак шымлымаш пашам эртареныт, шке родо-тукым але шочмо ял гыч Афганыште служитлыше-шамычым – мемнан жапысе талешке-шамычым – шарналтеныт.

Марий Эл 100 ий

logo 100

Погынлан 100 ий

logo 100

Аудиовозыш

Аудиовозыш

Видеовозыш

Видеовозыш

Кылвер

Е-mail:mari-centr@mail.ru

рушла
Яндекс.Метрика
© 2019 "Марий тӱвыра рӱдер" кугыжаныш бюджет тӱвыра тӧнеж. Чыла правам аралыме.