Адрес: 424000, Марий Эл республик, Йошкар-Ола, Первомайский урем, пӧрт 109.
Тел.: (8362) 45-88-51

Е-mail:mari-centr@mail.ru

рушла
Arrow
Arrow
Slider

25 ноябрьыште Российыште Аван кечыжым кумдан палемдыме. 20 ий ончыч шочшо пайремым Йошкар-Олаштат икмыняр вере эртарыме. Республикысе марий тӱвыра рӱдер ден «Саскавий» марий ӱдырамаш мер ушем «Авам дене пырля» конкурсым увертареныт ыле. Тудо эртыше шуматкечын, кылметылзын 24 кечынже, Калыкле президентский сымыктыш школышто эртен.

Тушко 3 ияш гыч 10 ияш марте шым икшыве аваж дене пырля таҥасымашке ушнен. Тиде – Мария ден Роза Альбертовна Васильевамыт (Медведево район Ельняги ял), Ксения ден Наталья Геннадьевна Богдановамыт (Оршанке район Кугунур села), Анастасия ден Ирина Михайловна Кудрявцевамыт (Оршанке район Кугунур села), Полина ден Алена Николаевна Толстовамыт (Звенигово район Кожласола села), Артем ден Альбина Ивановна Тойшевмыт (Оршанке район Кугунур села), Аня ден Инна Валерияновна Алексеевамыт (Морко поселко), Анна ден Светлана Евгеньевна Ерослановамыт (У Торъял поселко).

Пайремым ошма шоу почын. Пайремым вӱдышӧ-влак Марий Элын сулло артистышт Алина Егошина ден Александр Егошинын марий йомак гыч лудмо почеш сӱрет-влакым ошма дене сӱретлымым йочалан веле огыл, ончаш толшо ача-ава, кова-влакланат оҥай ыле.

Пайрем дене саламлыме мутым Оньыжа Эдуард Александров, Марий Элын тӱвыра, печать да калык-влакын пашашт шотышто министрын алмаштышыже да «Саскавий» марий ӱдырамаш ушемын вуйвер вуйлатышын алмаштышыже Галина Ширяева, Марий тӱвыра рӱдерым вуйлатыше Наталья Пушкина ойленыт.

Изи конкурсант-влак таҥасымашын кӱкшытшым куштылгын налыныт. Тидым икымше тапыр гычак койын. Тушто кажныже аваж нерген йӧратыме кумылжым почын каласкален. Тунамак пален нална: ик еш марий огыл, но марий йылме да тӱвырам шымлен шогат, ава ден ӱдыр марий йылме дене кутырат. Тиде – кажне ешлан пример лийшаш, кок але утларак йылмым палыме нигӧланат эҥгекым огеш кондо.

Моло тапырыште ава дене пырля таҥасыше-влак пеледыш аршашым сӱретленыт, подкогыльым ыштеныт, марий вургем дене сценыште йыгыре ошкылыныт, пырля мурым муралтеныт але кушталтеныт, йочам тӱрлӧ туткар деч шекланаш ача-аван туныктымыштым сценке гоч келыштарен ончыктеныт. Икманаш, кажне йоча шке мастарлыкшым да моштымыжым тӱрыс почын пуэн. Ксения Богданова аваж нерген туштым туштен каласкалыш, Артем Тойшев мурызо да куштызо семын шкенжым почо. Аня Алексеева сылнын почеламутым лудо. Кум ияш Полина Толстован «Маша ден маска» мультфильм гыч Машан рольыш устан пурыш, Анастасия Кудрявцева акаж дене муралтыш, авашт баяным шоктен. Мария Васильева еш ансамбль дене выступатлыш, марла моторын кушталтен ончыктышт. Палемдыман, тиде еш шуко шочшан, вич ӱдырым ончен кушта. Анна Еросланова – У Торъялын мурызо изи шӱшпыкшӧ.

Нунын тыршымыштым конкурсым аклыше-влак: Оньыжа Эдуард Александров, «Саскавий» ӱдырамаш мер ушемын еҥже-влак Галина Шкалина ден Маргарита Тойшева, «Ямде лий» газет редакторын алмаштышыже Людмила Григорьева – ужыныт да кажне ешым посна номинацийыште сеҥыше радамыш пуртеныт.

Тапыр-влак кокласе жапымат ончаш толшо-влак пайдалын эртареныт. Авалан пӧлеклалтше муро-влакым Марий Элын сулло артистше-влак Алина Егошина ден Татьяна Денисова, мурызо-влак Ольга Якимова, Александр Мамаев, Марина Садова, Валерий Чиванов, гармоньчо да семым возышо Олег Бакутов, ончыкылык мурызо шӱдыр Мария Прозорова йоҥгалтареныт.

Республик кӱкшытан таҥасымашке ушнышо кажне ешлан дипломым, Марий тӱвыра рӱдер да «Саскавий» марий ӱдырамаш мер ушем деч пӧлек-влакым кучыктымо. Йошкар-Оласе Марий Юмынйӱла ушем лӱм дене Ираида Степанова Артем Тойшев ден аважлан шарнымашан пӧлекым «калыкын ожнысо вургемжым шарымылан» кучыктен. «Ямде лий» газет йоча-влакым палемдыме кодын огыл, а эн изи ийготан Полина Толстовам пӧлекше дене куандарен. Тыгак ончаш толшо-влакат конкурсыш ушнышо ава-влаклан пеледыш аршашым кучыктеныт.

Школын фойештыже «Объективыште – ава» да «Марий калык пайрем – шочмо элнан тӱсшӧ» фотоончер пашам ыштен.

Марий Эл 100 ий

logo 100

Погынлан 100 ий

logo 100

Аудиовозыш

Аудиовозыш

Видеовозыш

Видеовозыш

Кылвер

Е-mail:mari-centr@mail.ru

рушла
Яндекс.Метрика
© 2019 "Марий тӱвыра рӱдер" кугыжаныш бюджет тӱвыра тӧнеж. Чыла правам аралыме.